Svör við algengum spurningum

Ef þú finnur ekki svar við þinni spurningu þá geturðu sent okkur fyrirspurn og við höfum samband við fyrsta tækifæri.

Hve mikið get ég fengið lánað í heildina hjá Framtíðinni?

Lágmarkslán hjá Framtíðinni er 250 þúsund krónur og hámarkslán er 13 milljónir króna.

Get ég fengið lán hjá Framtíðinni þó ég sé með lán frá LÍN?

Já, vissulega. Við teljum lán frá LÍN vera einkar góða leið fyrir námsmenn til að fjármagna menntun sína og hvetjum þá til að sækja um það fyrst. Hins vegar getur háskólanám verið kostnaðarsamt, sérstaklega fyrir fjölskyldufólk, auk þess að námsmenn sem koma af vinnumarkaði eða eru ekki í fullu námi eiga oft ekki kost á fullu láni frá LÍN. Við þannig aðstæður getur lán frá Framtíðinni hentað vel.

Hvernig eru lánin greidd út?

Námslán eru lögð inn á þann reikning sem námsmaður tiltekur í umsóknarferlinu. Framfærsla er greidd út í upphafi hvers mánaðar.

Hvenær þarf ég að byrja að borga af láninu?

Endurgreiðslur hefjast ekki fyrr en 6 mánuðum eftir námslok. Í kjölfarið er lánið greitt til baka með mánaðarlegum jöfnum greiðslum (annuitet) yfir allt að 12 ára tímabil.

Get ég greitt lánið upp?

Já, vissulega. Námsmönnum er frjálst að greiða upp lánið hvenær sem er, að fullu eða að hluta til. Engin gjöld eru tekin fyrir uppgreiðslur.

Hvað ef ég skipti um nám eða skóla?

Slík tilvik verða skoðuð og metin hverju sinni af starfsmönnum Framtíðarinnar. Við hvetjum námsmenn til að hafa samband tímanlega ef aðstæður breytast.

Hvað ef ég hætti í náminu?

Þá verða ekki frekari útgreiðslur af hálfu Framtíðarinnar og lánið þarf að greiða til baka. Við slíkar aðstæður vill Framtíðin þó eindregið hvetja námsmenn að hafa samband sem fyrst svo hægt sé að greiða úr málum á farsælan hátt.

Hvers konar nám er lánshæft?

Nám í öllum háskólum á Íslandi er lánshæft til framfærslu- og skólagjalda. Annað nám á Íslandi sem einnig er lánshæft er starfsnám, endurmenntun og nám með vinnu. Framtíðin veitir auk þess námslán til framfærslu- og skólagjalda við alþjóðlega viðurkennda háskóla sem gera sambærilegar kröfur til undirbúningsnáms og háskólar á Íslandi.

Hverjir geta sótt um lán?

Allir námsmenn eldri en 20 ára sem lokið hafa fyrsta ári í grunnnámi háskóla og eru í eða stefna á lánshæft nám geta sótt um.

Hvernig er umsóknarferlið?

Sótt er um lán í gegnum netið á umsóknarvef Framtíðarinnar. Við nýskráningu sendum við lykilorð í netbankann þinn og eftir það getur þú hafist handa við umsóknina. Upplýsingar sem þú þarft að gefa upp þegar þú fyllir út umsóknina eru t.d. tegund láns sem sótt er um, áætlað nám, fjárhagsupplýsingar og fleira.

Hægt er að vista umsóknina og halda áfram með hana síðar, til dæmis ef afla þarf einhverra gagna í millitíðinni. Eftir að umsókn er send inn færðu svar um skilyrt samþykki innan tveggja vikna og beiðni um viðbótargögn til að staðfesta upplýsingar úr umsókn.

Þarf ég að vera með ábyrgðarmann eða veð til að geta fengið lán?

Almennt er ekki gerð krafa um ábyrgðarmann eða veð fyrir láni. Í ákveðnum tilfellum getur verið óskað eftir ábyrgðarmanni til að uppfylla skilyrði fyrir láni.

Þarf ég að senda ykkur upplýsingar um námsframvindu?

Ef þú tekur lán yfir lengra tímabil en eina önn biðjum við þig um að senda inn upplýsingar um námsframvindu á heimasvæði þitt á vef Framtíðarinnar. Lán vegna vorannar eru greidd út þegar námsframvinda haustannar liggur fyrir.

Hafa tekjur áhrif á lán?

Nei, tekjur hafa ekki áhrif á námslán hjá Framtíðinni.

Hvað er lántökugjaldið hátt?

Lántakar greiða 3,95% lántökugjald sem leggst við höfuðstól lánsins.

Get ég frestað greiðslum ef ég er til dæmis tímabundið án atvinnu?

Já, þú átt kost á að fresta greiðslum í allt að þrjá mánuði lendirðu í aðstæðum sem gera þér erfitt um vik að greiða af námsláninu. Þetta getur verið tímabundið atvinnuleysi, veikindi eða aðrar ástæður. Á því tímabili sem greiðsluhléið stendur yfir leggjast ógreiddir vextir við höfuðstól.

Þér er frjálst að taka allt að þrjú greiðsluhlé yfir lánstímann, en í mesta lagi tvö greiðsluhlé yfir hvert tólf mánaða tímabil.

Get ég sótt um aftur ef ég fæ neitun?

Já, Framtíðin hvetur þá sem ekki hljóta samþykki til þess að sækja um síðar á námsferlinum.

Eru gerðar kröfur um lágmarks námsframvindu?

Nei, Framtíðin gerir ekki slíkar kröfur. Við viljum vera sveigjanleg gagnvart þeim sem kjósa að taka námið á sínum hraða.

Á ég möguleika á námsláni ef ég er skráð(ur) á vanskilaskrá?

Ekki eru veitt lán til einstaklinga sem skráðir eru á vanskilaskrá.

Á hvaða kjörum eru námslánin?

Við bjóðum upp á tvær tegundir námslána: Verðtryggð eða óverðtryggð. Vextir taka mið af vaxtatöflu Framtíðarinnar hverju sinni, sjá nánar um lánskjör hér.

Get ég fengið frest á afborgunum ef ég ákveð að fara í framhaldsnám eftir grunnnámið?

Hægt er að sækja um frest á afborgunum ef þú ákveður að fara í framhaldsnám að loknu grunnnámi sem þú hefur tekið lán fyrir. Hvert tilvik fyrir sig er skoðað sérstaklega og metið hverju sinni.

Framtíðin hvetur námsmenn eindregið til að mennta sig frekar að loknu grunnnámi.